ProLingua, plataforma a prol da defensa e promoción da lingua galega

Sr. D. Félix Juncal Novas

Alcalde de Bueu

Os poderes públicos en territorios con lingua propia teñen a obriga de mirar por ela con especial atención. E mirar por ela non debería traducirse só en falar e escribir en galego, senón falar e escribir en galego ben.

No ámbito municipal, toca ocuparse de aspectos locais, moi próximos á cidadanía. Asuntos domésticos, algúns deles moi de a pé de rúa. Acontece que quen pasee por Bueu poderá observar sinais de tránsito e letreiros con erros lingüísticos. Así acontece coas indicacións que marcan o camiño cara á praia de *Tuia no canto de Tulla; e o mesmo lle sucederá a quen lea, nas recomendacións que se expoñen no parque da Barraca, vocábulos como *Mayores, [Centro de] *Salud, [Urxencias] *Xerales ou *Mantenemento.

A falta de corrección e o carácter público dos rótulos referidos desmerecen o seu labor no Concello e resultan por completo inapropiados, e por este motivo convidámolo a ser máis coidadoso no uso do idioma, reparar eses letreiros e intentar evitar que outros polo estilo ocupen no futuro as rúas e parques de Bueu.

Atentamente,

ProLingua, 19 de xaneiro do 2015