ASTURIANU [ASTURIANO]

MANIFIESTU

Tradución: Xuan Bello

INTRODUCCIÓN

La Llingua Gallega ye’l patrimoniu inmaterial de más valir del pueblu gallegu. Ye lo que nos identifica como lo que somos, xente gallego, y lo que nos asitia en mundu.

ANTECEDENTES

Los gallegos tamos bien arguyosos de tener una llingua milenaria con un pasáu gloriosu que, por delles circunstancies polítiques, entró nun túnel de silenciu forzosu nes primeres décades del sieglu XVI hasta convertise n’instrumentu de marxinación y xufrimentu moral y físicu de mui bien delles xeneraciones. L’usu oral ininterrumpíu que d’ella fixo la xente humilde y el llabor de les élites intelectualess qu’a partir del sieglu XIX supieron rehabilitala, fixeron posible salvar lo que ye l’elementu principal d’identidá de la xente gallego y la base esencial de la cultura de nueso.

La xera de toes eses persones propició que güei Galicia sía una nacionalidá histórica y que cuente con autonomía política, y los diferentes gobiernos autonómicos foron poniendo los cimientos pa la recuperación social de la llingua galega, particularmente nes estayes del enseñu, de l’alministración y de los medios de comunicación públicos.

PRESENTACIÓN

ProLingua ye una plataforma que crearon persones d’ideoloxía y profesión bien diversa que tien como oxetivos exclusivos la promoción del gallegu como llingua propia de Galicia (y de les comarques fronterices) y la consecución de la so oficialidá real, que pasa per una presencia normal n’ámbitos de los que se mantién prácticamente excluída, como la empresa, la xusticia y dellos otros servicios públicos y privaos, especialmente los medios de comunicación.

En función d’esto, declaramos como oxetivos irrenunciables de ProLingua la totalidá de los conteníos de l’actual Llei de Normalización Llingüística de 1983 y el Plan Xeneral de Normalización de la Llingua Gallega de 2004, que contaron, n’entrambos los dos casos, cola aprobación por unanimidá del Parllamentu de Galicia.

Tamos nun Estáu de derechu y como ciudadanes y ciudadanos esiximos que se cumpla de xeitu plenu la llexislación qu’hai en materia llingüístico.

Otra manera esiximos que nun s’amañe nenguna midida llexislativa que suponga perda de derechos de parte de les gallegues y de los gallegos pa usar y conocer la llingua gallega y a facer d’ella la so señal d’identidá gallega.

FUNCIONAMIENTU

-Establezse como únicu requisitu a les persones que deseen pertenecer a esta plataforma, la intención de comprometese na defensa de la llingua gallega y na promoción del so usu en tolos ámbitos, tanto públicos como privaos.

-Arréu de que la llingua gallega ye patrimoniu del pueblu gallegu, refugamos cualquier pretensión d’apropiase d’ella o d’atribuila a cualquier grupu o ideoloxía particulares. Por eso ProLingua declárase una plataforma apartidaria y plural.

-Los miembros de ProLingua sonlo a títulu personal y nun gasten representatividá nenguna de grupos o asociaciones na so pertenencia a esta plataforma.

-ProLingua va promover acciones de tou tipu embredaes a la consecución de los sos oxetivos, más nunca se va sumar como ProLingua a nenguna acción ayena, a la que van tener plena llibertá d’apautase les persones que la integren de manera individual.

-Cuando nuna acción figure’l logo de ProLingua nunca va poder figurar nengún otru, sía del tipu o motivación que sía.

-La representatividá de ProLingua recái na totalidá de los sos miembros en plena igualdá y nun va tener más camín d’interlocución colos poderes públicos que’l cumplimientu íntegru de los sos oxetivos.