USO DE COOKIES

Este sitio web utiliza cookies de sesión e analíticas, propias e de terceiros que nos informan sobre os seus hábitos de navegación e vanse utilizar para mellorar a súa experiencia de navegación. Se continúa navegando, consideramos que acepta o seu uso. Para obter máis información e/ou cambiar a configuración prema aquí.

ACEPTAR
imagen banner

" Non estou aquí pola lingua dos meus pais nin pola miña, estou pola dos meus fillos e dos meus
netos "

Manifestación pola lingua galega en Outubro de 2009 en Compostela

Voces

Carta ao Reitor da Universidade da Coruña

julio abalde alonso reitor da universidade da coruña
Por José Manuel Pazos Riveiro
 
 
Estimado señor reitor:
 
Namentres desenvolvía os labores propios do meu sexo, - face-lo xantar, tende-la roupa, - tiña posta unha orella en “El coruñés opina”do pasado domingo,17 de Xuño.
 
Co gallo das probas de ingreso na Universidade, a directora deste programa da cadea SER xuntou na súa mesa un grupo de docentes, todos/as agás un do eido universitario coruñés, para falar da organización actual das carreiras universitarias e do seu futuro.
 
Desde o intre mesmo de dar comezo as súas intervencións decateime de que ningún deles empregaba o galego. Tampouco o fixo unha señora vicerreitora da súa reitoría. Mesmo un investigador de tese de doutoramento moi loubada, con manifesto acento e dicir lusófono falou na lingua de Cervantes. Nin unha verba en galego por parte de ningún deles nas dúas horas de programa. Deixo constancia de que o único dos alí presentes que empregou a nosa Lingua foi un profesor de Ensino Secundario, especialista dos Equipos de Apoio da Consellería de Educación, Domingo Álvarez. Podería sinalar ós outros pero non me parece “elegante”.Un termo moi coruñés.
 
Estimado señor, nestes días, os media de comunicación veñen cheos de informes e estatísticas sobre da perda imparable de falantes da nosa Lingua. Atribúen tal desastre ao malfadado Decreto da Xunta, máis concretamente, ao feito de non se impartiren obrigatoriamente en galego algunhas disciplinas do Ensino Primario e Secundario. Polo que puiden ouvir, a nosa probe Lingua tamén anda comesta dos ratos nesa “alma mater” da súa digna dirección.
 
Bo será que lle preste atención a este asunto non menor e que lle atinxe directamente. Vénseme a cabeza aquilo do Libro Santo, Mateo 15, 14: “Se un cego guía outro cego ambos os dous caen no furado”.O furado será a noite preta da nosa Lingua e do noso País.
 
Atentamente.
 
 
Asdo. José Manuel Pazos Riveiro
 
DNI 33144249F
 
 
A Coruña, 20 de Xullo de 2018
 
Sr. Dn. Julio Abalde Alonso, Reitor da Universidade de A Coruña.
julio abalde alonso reitor da universidade da coruña

julio abalde alonso reitor da universidade da coruña

ProLingua. Licenza CC-BY-SA 3.0 ou superior