"Alumea a túa lingua!"
O Concello de Vigo, a través do seu SNL, organiza a maratón de actividades Alumea a túa lingua!, para conmemorar o 150 aniversario da publicación en Vigo dos Cantares Gallegos de Rosalía. Concertos, charlas, recitais, festa, animación, etc., encherán de lingua espazos de Vigo ata o mes de maio.
Se un maratón deportivo ten 42 quilómetros, o maratón Alumea a túa lingua! Vigo en galego ten 42 actividades, que comezaron xa en febreiro, cando se prendeu o facho, e que rematarán o 17 de maio, día en que se cumpren 150 anos da publicación de Cantares Gallegos, de Rosalía de Castro, nunha imprenta da rúa Real (Vigo).
O programa, que se desenvolverá en colaboración con diferentes entidades da cidade, inclúe, entre outras actividades, concertos musicais, recitais poéticos, certames escolares, contacontos dramatizados ou charlas sobre a obra rosaliana.
E entre as 42 accións podemos atopar un pouco de todo... Un certame de regueifas; lecturas nos mercados; exposición en volta de Rosalía; charlas; contacontos; un maratón musical; o concerto Rosalía 21 con Abe Rábade, Guadi Galego e Anxo Angueira; obradoiros de hip hop a partir dos versos de Rosalía; animación de rúa; concerto de Aid; distribución de poemas de Rosalía en 50 linguas; e moito, moito máis!
Información tirada da web da CTNL.
- Tags:
- CTNL lingua normalización