Póñense en marcha múltiples accións por un Nadal en galego
A Coordinadora Galega de ENDL habilita un espazo específico no seu web con diferentes recursos para un Nadal en galego, onde se pode atopar información sobre cancións, cartas, contos, refráns, agasallos, recursos didácticos...
Tamén desde a Secretaría Xeral de Política Lingüística (SXPL) se habilitou un espazo para un Nadal en rede, con actividades a través da Rede de Dinamización Linguística.
Abertos ao Galego comezou a difundir un catálogo de agasallos en galego, con propostas das empresas que pertencen a esta rede: música, camisolas, libros, xoiaría, alimentación, etc.
Desde moitos departamentos de normalización tamén se difunden cartas para incentivar que as nenas e os nenos lles escriban aos Reis, Apalpador ou Papá Noel en galego. É o caso, por exemplo, dos concellos de Ames e Santiago de Compostela, que organizan, ademais, concursos de cartas.
Tamén o SNL do Concello de Narón puxo en marcha o espazo Felicita o Nadal en galego e o SNL do Concello de Oroso organiza un concurso de postais de Nadal en galego.
E por segundo ano o SNL do Concello de Redondela organiza o concurso de escaparates de Nadal, para fomentar o uso do galego no comercio local, actividade enmarcada na campaña O Noso Vende.
Información tirada do web da Coordinadora de Traballadores/as de Normalización da Lingua.