Grave conculcación de dereitos en Muros
O pasado día 9 de abril difundiamos nas redes de ProLingua que “o asesor xurídico de Muros, actuando como tal, pon trabas aos veciños que se expresen en galego. Un vergoñento abuso do poder que ostenta este señor para afondar nos prexuízos e no maltrato á cultura de noso. Repugnante.”, e ligabamos a un vídeo de denuncia achegado polo BNG daquel concello. Como complemento a aquela información, queremos ampliar co que nos acaban de achegar: o 18 de abril a formación política CxG entregou por rexistro de entrada unha moción propoñendo a destitución do asesor xurídico do concello, entre outros motivos, por tentar obrigar a veciñanza de Muros a falar castelán, incumprindo así o Regulamento de uso do galego. Ben, o caso é que lonxe de recuaren os autores da mencionada conculcación de dereitos lingüísticos, deron en programar para o xoves 25 de abril unha moción na que a alcaldesa, Caridad González Cerviño, co gallo de lexitimar o comportamento contrario á lei do asesor xurídico, pretende botar por terra o Regulamento de uso do galego aprobado en 2001 por unanimidade.
Por iso, agora, a nosa repulsa é dupla.